Осиё тараққиёт банки Ўзбекистон давлат сектори ислоҳотларини қўллаб-қувватлаш учун 500 миллион доллар кредит ажратди
Маблағлар давлат бошқарувининг самарадорлигини ошириш, иқтисодий тартибга солишни такомиллаштириш ҳамда мамлакатнинг жаҳон иқтисодиётига интеграция жараёнини тезлаштиришга йўналтирилади.
Иқтисодий бошқарувни яхшилаш дастурининг иккинчи босқичи аввалги ислоҳотларни давом эттириб, бюджет жараёнининг шаффофлигини ошириш, давлат корхоналарини бошқаришни модернизация қилиш ва рақобатбардош, инклюзив ҳамда барқарор иқтисодий муҳит яратиш чораларини ўз ичига олади.
Дастур халқаро стандартларга мувофиқ бўлиб, Ўзбекистоннинг бозор ислоҳотларини чуқурлаштириш йўлидаги интилишини акс эттиради.
«Ушбу дастур Ўзбекистоннинг институционал ислоҳотларни амалга ошириш, инклюзив ўсишни қўллаб-қувватлаш ва халқаро ҳамкорликни мустаҳкамлашга бўлган қатъийлигини намоён этади», — деди АТБнинг Ўзбекистондаги ваколатхонаси директори Канокпан Лао-Арая.
Унинг сўзларига кўра, АТБ мамлакатни Жаҳон савдо ташкилотига аъзо бўлиш ва глобал алоқаларни ривожлантириш жараёнида қўллаб-қувватлашни давом эттиради.
Дастур доирасида давлат инвестицияларини давлат-хусусий шериклик лойиҳаларига жалб этиш бўйича ягона қоидаларни жорий этиш, рақобат ва инвестиция муҳитини тартибга солувчи қонунчиликни такомиллаштириш ҳамда давлат компанияларини халқаро стандартлар ва гендер мувозанатига мувофиқ бошқариш режалаштирилган.
Шунингдек, дастур солиқ базасини кенгайтиради, халқаро солиқ ҳамкорлигини мустаҳкамлайди ва манфаатлар тўқнашуви ҳақидаги қонунни қабул қилиш ҳамда аудит тизимини янгилаш орқали коррупцияга қарши чораларни кучайтиради.
Бундан ташқари, миллий қонунчилик савдо ва инвестициялар соҳасидаги халқаро меъёрларга мувофиқлаштирилади, бу эса мамлакатнинг ЖСТга аъзо бўлиш жараёнини қўллаб-қувватлайди.
Дастурда ижтимоий ҳимояга ва ислоҳотларнинг ижтимоий жиҳатдан заиф қатламларга бўлиши мумкин бўлган салбий таъсирини юмшатишга алоҳида эътибор қаратилган, бу орқали тенг имкониятлар ва ижтимоий барқарорлик таъминланади.
Қайд этиш жоизки, жорий йилда АТБ ва Ўзбекистон ҳамкорлигининг 30 йиллиги нишонланмоқда. Шу вақтгача банк мамлакатга 14,6 миллиард доллар миқдорида кредитлар, грантлар ва техник ёрдам кўрсатган.
Комментарии