Тошкентга учиб келаётган самолёт зилзила сабаб биринчи уринишда қўнмади

Бугун Тошкентда соат 01:29 да эпицентри Қирғизистонда бўлган 3 магнитудали силкинишлар сезилди.

Uzbekistan Airports Матбуот хизматип хабарига кўра, "Аэрофлот" авиакомпаниясининг Москва-Тошкент йўналишидаги SU-1870 рейси парвоз пайтида, диспетчер кўрсатмасига асосан иккинчи айланишга (қўниш учун иккинчи уриниш) кетган. Ушбу қарор стандарт хавфсизлик жараёнидир. Ушбу манёврдан сўнг самолёт маҳаллий вақт билан соат 1:50 да Тошкент аэропортига келиб қўнган.

"Иккинчи айланишга ўтиш" - бу қўниш жараёни тўхтатилгандан сўнг иккинчи маротаба қўнишга уриниш.

Зилзила сабаб қуйидаги ҳолатлар юзага келиши мумкин:

— учиш-қўниш йўлагини яроқсиз ҳолга келтириши мумкин бўлган ёриқлар, силжиш ва парчаланиш;

— радар, метеорологик ва ёруғлик қурилмаларининг жойидан силжиши ёки шикастланиши;

— вайроналар, қулашлар ва тўсиқлар;

— алоқа ёки навигация тизимидаги носозликлар.

Агар қўнишга яқинлашиш вақтида силкинишлар сезилса, учувчи ёки авиадиспетчер манёврни тўхтатишга ва қайта қўниш учун самолётни иккинчи уринишга юбориши мумкин. Ушбу чора аэродром ходимларига учиш-қўниш йўлаги ва жиҳозларнинг ҳолатини текшириш учун вақт беради.

Шундай қилиб, зилзила пайтида қайта қўниш манёврига ўтишни талаб қиладиган аниқ қоида йўқ. Шу билан бирга, умумий хавфсизлик қоидаларига мувофиқ: агар қўнишга яқинлашиш пайтида беқарор ёки потенциал хавфли шароитлар юзага келса, экипаж қўнишни тўхтатиши ва стандарт айланиш жараёнини бажариши керак.