Сешанба куни бўлиб ўтган йиғилишда Шавкат Мирзиёев мактабгача ва мактаб таълими соҳасида ўзгаришлар амалга оширилаётгани ва барқарор натижалар кузатилаётганини таъкидлади. Бироқ, унинг сўзларига кўра, касб-ҳунар ва олий таълим учун масъул раҳбарлар ҳанузгача таълим тизимидаги ислоҳотларнинг мазмун-моҳиятини тўлиқ англаб етмаган.
Шу боис, олий таълим, фан ва инновациялар вазирининг барча ўринбосарлари – биринчи ўринбосар Шохруҳ Далиев, ўринбосарлар Отабек Маҳкамов ва Сарвархон Бузрукхонов ишдан олингани эълон қилинди.
Шунингдек, Президент фармони ва қарори билан Президент Администрацияси ҳузуридаги Таълим сифатини таъминлаш миллий агентлиги директори Адхам Худайкулов бошқа ишга ўтиши муносабати билан ҳамда Олий таълим, фан ва инновациялар вазирлиги ҳузуридаги Инновацион ривожланиш агентлиги директори Шароф Ражаббаев лавозимидан озод этилди.
Эндиликда мактабгача ва мактаб таълими ҳамда олий таълим, фан ва инновациялар вазирлари, уларнинг ўринбосарлари, ҳокимлар превентив ва проактив ишлашга ўтиб, таълимнинг барча йўналишларида катта ўзгариш қилиши шартлиги кўрсатиб ўтилди.
Комментарии