Ҳукумат қарорига кўра, жорий йилнинг 1 октябридан бошлаб "Ўзбекистон республика товар-хомашё биржаси" АЖ тизими орқали чиройли авторақамларни сотиш бўйича аукцион савдоларини ўтказиш тўхтатилади.
Сотилмаган комбинациялар тоифаларга қараб ҳайдовчилар ўртасида тақсимланади: 1-3 тоифадаги рақамлар "Ўзавтомотобелги" корхонаси орқали ягона оширилган тариф бўйича сотилади, 4-6 тоифадаги рақамлар эса амалдаги тартиб бўйича оширилган тарифсиз берилади.
2026 йил 1 январдан бошлаб ЎзРТХБ тизими орқали рақамли белгилар билан аукционлар ўтказиш, шунингдек, талаб юқори бўлган ҳарф-рақамли комбинациялардаги рақамли белгиларни оширилган тарифлар бўйича бериш тартиби бекор қилинади.
Бунда талаб юқори бўлган комбинацияларсиз давлат рақам белгиларини беришнинг амалдаги тартиби сақлаб қолинади.
Жисмоний ва юридик шахслар ўзлари хоҳлаган ҳарф ва рақамлар комбинациясига эга давлат рақам белгиларини ягона оширилган тариф бўйича тўғридан-тўғри электрон мурожаат асосида олишлари мумкин бўлади.
Шу билан бирга, ҳарф ва рақамларнинг эркин комбинацияларига эга бўлган рақам белгиларининг ягона очиқ маълумотлар базаси ишга туширилади. Унга қуйидагилар орқали кириш мумкин:
- Қорақалпоғистон Республикаси ИИВ, Тошкент шаҳар ИИББ ва вилоятлар ИИВ бошқармалари ва бўлинмаларида жойлашган инфокиоскалар;
- ИИВ Йўл ҳаракати хавфсизлиги хизматининг мобил иловаси;
- ИИВ ЙҲХБ расмий сайти;
- Ягона интерактив давлат хизматлари портали.
Барча рақам белгилари ҳудудларнинг кодлари бўйича ягона очиқ маълумотлар базасига жойлаштирилади.
Кейинчалик битта ҳудудий код доирасида ҳарф ва рақамларнинг "нуфузли" комбинацияларини бериш чекланади - улар фақат 90% комбинациялар аллақачон банд бўлган тақдирдагина мавжуд бўлади.
Комментарии