Ўзбекистон аҳолисининг учдан бир қисми пулларини банкка қўймасдан сақлайди — Марказий банк

Марказий банк нақд пул муомаласи ва нақд пул тўловларини ташкил этиш бўйича сўровнома ўтказди, унда 142 нафар респондент иштирок этди.

Аҳоли жамғармаларини 23 фоизини ўзларида нақд пул шаклида ва шунча қисми банк карталарида, шунингдек 20 фоизи банклардаги омонат ҳисобварақларда сақлашларини билдиришган бўлса, 34 фоизи жамғармалари мавжуд эмас эканликларини маълум қилишган.

Сўров натижаларига кўра, жамғармаси бўлмаган фуқароларнинг энг катта улуши Тошкент шаҳрида қайд этилган – 38 фоиз.

Нақд пул маблағларини сақлаш бўйича биринчи ўринни Андижон вилояти эгаллаган бўлса, омонатлар бўйича энг паст кўрсаткичга эга.

Нақд пул жамғармаларининг энг кам миқдори Қорақалпоғистонда бўлиб, бу ерда, аксинча, бошқа ҳудудларга нисбатан депозитлар маблағларни сақлашнинг энг мақбул шакли ҳисобланади.

Марказий банк резидентлар омонатларини қандай очиши ва тўлдиришини ҳам аниқлади. Сўров натижаларига кўра:

Аҳолининг 36 фоизи омонат маблағларини банкка борган ҳолда нақд пул шаклида, 29 фоизи банк картасидан ҳамда 35 фоизи банкка бормасдан, мобил иловалар орқали шакллантирмоқда.

Омонатларни шакллантириш учун мобил иловалардан фойдаланадиган мижозлар улуши бўйича Қорақалпоғистон етакчи, бу кўрсаткич бўйича Тошкент шаҳри иккинчи ўринда.

Шу билан бирга, Андижон ва Хоразм вилоятлари аҳолиси кўпинча омонатларини нақд пулда тўлдиради.