Ўзбекистон ЯИМ 2025 йил биринчи ярмида 7,2% га ўсди

Иқтисодий ўсишга асосий ҳиссани саноат, хизматлар соҳаси ва қурилиш тармоқлари қўшди.

Саноат тармоғида 6,6% ўсиш қайд этилди (ЯИМга ҳисса — 1,6 фоиз). Республика корхоналари томонидан 488,5 трлн сўмлик саноат маҳсулоти ишлаб чиқарилди. Бу ўсишга қайта ишлаш саноати (+7,1%), сув таъминоти, канализация ва чиқиндиларни қайта ишлаш (+9,7%), электр ва газ таъминоти (+3,1%) ҳамда кончилик саноати (+5,1%) ҳисса қўшган.

Қишлоқ, ўрмон ва балиқчилик хўжаликларида 4% ўсиш қайд этилган бўлиб, ЯИМга 0,6 фоиз пункт ҳисса қўшган. Балиқчилик (+9,4%), полиз маҳсулотлари (+8,3%), тухум (+8,2%), мевалар (+6,6%) ва дон (+4,5%) ишлаб чиқариш ҳажми ортиши асосий омил бўлди.

Қурилиш соҳасида 10,7% ўсиш кузатилган (ЯИМга 0,8 фоиз пункт). Умумий қурилиш ишларининг 22,4% (30,7 трлн сўм) йирик корхоналар, 52% дан ортиғини эса кичик корхоналар ва микрофирмалар (71,6 трлн сўм) амалга оширган.

Хизматлар соҳасида 8,2% ўсиш қайд этилган (ЯИМга ҳисса — 4 фоиз пункт). Савдо, жумладан яшаш ва овқатланиш хизматлари 10,2% га, транспорт, омборлаш, ахборот ва алоқа хизматлари эса 14,7% га ўсди.

Маҳсулотларга солинадиган соф солиқлар ҳажми 6,5% га ошган бўлиб, ЯИМ ўсишига 0,2 фоиз пункт ҳисса қўшган.