Интерполнинг Ўзбекистондаги Миллий марказий бюроси (Интерпол ММБ) ва АҚШдаги ваколатли органлар ўртасидаги самарали ҳамкорлик натижасида жиноят содир этганликда гумонланган Ўзбекистон фуқароси АҚШда қўлга олиниб, Ўзбекистонга қайтарилди. Бу ҳақда Интерполнинг Ўзбекистондаги Миллий марказий бюроси Матбуот хизмати хабар берди.
Унга кўра, ушбу шахс ЖКнинг 167-моддаси 3-қисмида назарда тутилган — кўп миқдорда ўзлаштириш ёки растрата йўли билан талон-торож қилиш жиноятини содир этгани учун қидирувда бўлган.
Интерпол ММБ томонидан АҚШ ҳуқуқни муҳофаза қилувчи органлари ва АҚШнинг Ўзбекистондаги элчихонаси билан ахборот алмашинуви ва музокаралар натижасида унинг депортация қилинишига эришилди.
Қидирувдаги шахс 2025 йил 13 июль куни Тошкент шаҳридаги Ислом Каримов номидаги халқаро аэропортга олиб келинди ва Интерпол ММБ ходимларига топширилди. Ҳозирда қонунчиликка мувофиқ жавобгарлик масаласи кўриб чиқилмоқда.
Комментарии