Навоийда "Қизил" китоб"га киритилган 15 та илонни ноқонуний олиб кетаётган шахс ушланди

Маълум қилинишича, Тошкент вилояти божхона бошқармаси ҳамда Экология вазирлиги ходимлари билан ҳамкорликда тезкор тадбир ўтказилган.

Тезкор тадбирда "Навоий" чегара божхона пости орқали Ўзбекистондан чиқиб кетаётган қўшни давлат фуқароси 15 бош тирик бўғма илонларни тегишли рухсатномаларсиз олиб чиқмоқчи бўлган вақтида тўхтатиб қолинди.

Унга тегишли 10 литр ҳажмли елим идишга жойланган мазкур илонлар "шарқ бўғма илони" зотига мансуб бўлиб, Ўзбекистон Республикасида Устюрт платоси, Жанубий Оролбўйи, Возрождения яримороли, Марказий Қизилқум, Зарафшон водийси, Қарши чўли, Зарафшон тоғи, Қашқадарё, Жиззах вилояти (Зомин тумани), Сирдарё вилояти чўллари, Тошкент вилоятидаги тоғ ёнбағирлари, Фарғона водийси, Сурхондарё вилоятининг текислик ва тоғолди қисмида учрайди.

Мутахассисларнинг таъкидлашича, ушбу илонлар Ўзбекистон Қизил китобига киритилган.

Маълумот ўрнида, ҳозирда жониворлар Тошкент ҳайвонот боғига топширилган.