“Тошкент-Аэро” ихтисослаштирилган божхона коплексининг “Тошкент халқаро аэропорти” чегара божхона постида заргарлик буюмларини қонунга хилоф тарзда олиб киришга бўлган қатор уринишлар фош қилинди. Бу ҳақда Божхона қўмитаси Матбуот хизмати хабар қилди.
Маълум қилинишича, Бангкокдан учиб келган йўловчилардан бири юклари орасидаги ширинликлар ичига 180 млн сўмдан ошиқ бўлган 121 гр оғирликдаги заргарлик буюмларини яширганча олиб киришга уринган вақтида тўхтатиб қолинган,
“Тошкент-Истанбул” рейси бўйича парвозини якунланган қўшни давлат фуқароси ҳам багажидаги юклари орасида қиймати 350 млн сўмлик 370 гр оғирликдаги заргарлик буюмларини яшириб олиб кираётганида фош қилинди.
Шунингдек, яна бир ҳолатда қўшни давлат фуқароси бўлган йўловчи қиймати салкам 130 млн сўмлик ҳамда олмос тошлари билан безатилган 74 гр оғирликдаги заргарлик буюмларини ноқонуний равишда олиб киришга уринган.
Ҳозирда юқоридаги ҳолатлар юзасидан божхона текширувлари давом этмоқда.
Маълумот ўрнида, республикада божхоначилар томонидан жорий йилнинг ўтган даври мобайнида аниқланган 252 та божхона қонунбузилиши ҳолатларида қиймати 24,3 млрд сўмлик салкам 40 кг оғирликдаги заргарлик буюмларининг божхона чегараларидан ноқонуний равишда олиб ўтилиши ва ички ҳудуддаги яширин айланмасига чек қўйилган.
Комментарии