Бугун, 8 май куни давлатимиз раҳбари сўнгги йиллардаги анъанага мувофиқ, ўзбек халқининг уруш йилларида чеккан азоб-уқубатлари, кўрган қийинчиликлари, мардлиги ва йўқотишларининг рамзи бўлган "Матонат мадҳияси" монументи пойига гулчамбар қўйди. Бу ҳақда давлат раҳбари Матбуот хизмати хабар бермоқда.
Маросимда Қуролли Кучлар, давлат ва жамоат ташкилотлари вакиллари, маҳалла фаоллари, нуронийлар ҳам иштирок этди. Иштирокчилар ёдгорлик пойига гуллар қўйди.
Давлат раҳбари боғда ўрнатилган "Хотира чироғи" композициясини ҳам кўздан кечирди. У фронтда жанг қилган ва фронт ортида меҳнат қилган ўзбекистонликларнинг қаҳрамонлигига бағишланган.
"Бундай мураккаб ва шарафли Ғалабага муносиб ҳисса қўшган мард ва жасур халқимиз билан ҳар қанча фахрлансак, ғурурлансак, арзийди. Бу қаҳрамонликни унутиб бўлмайди, бу ҳақиқатларни ёшларга етказиш керак. Айниқса, ҳозирги таҳликали замонда бу жуда муҳим. Ҳар биримиз Ватан ҳимоясига ҳар куни тайёр туришимиз керак, - деди Шавкат Мирзиёев.
Архив маълумотларига кўра, фашизмга қарши олиб борилган қонли жангларда жами 6,8 миллион аҳолидан 2 миллионга яқини қатнашган. Уларнинг қарийб 540 минг нафари ҳалок бўлган, 158 минг нафари бедарак йўқолган, 50 мингдан зиёд киши конслагерлардаги чидаб бўлмас қийноқлардан вафот этган, 60 мингдан ортиғи фронтдан ногирон бўлиб қайтган. Ўзбекистонлик 214 минг аскар ва офитсер жанговар орден ва медаллар билан тақдирланди.
Оғир шароитга қарамасдан, ўзбек халқи жанг майдонларидан кўчирилган қарийб 1,5 миллион кишини, жумладан, 250 минг етим-есирни ўз бағрига олди.
Комментарии