Самбо бўйича Ўзбекистон терма жамоаси аъзоси Дилшод Чориев 4 йилга дисквалификация қилинди. Бу ҳақда Миллий антидопинг агентлиги Матбуот хизмати хабар берди.
Спортчининг 2021 йил 7 майдан 2025 йил 6 майгача барча спорт мусобақаларида иштирок этиши тақиқланади.
Жорий йилнинг 25 март куни Москва шаҳрида ўтказилган самбо бўйича “Мемориал Харлампиев” номли жаҳон кубогида -98 кг вазнда иккинчи ўринни эгаллаган Дилшод Чориевдан олинган допинг-синамада “мельдоний” тақиқланган моддаси топилгани ортидан текширув бошланганди.
Эслатиб ўтамиз, Бутунжаҳон антидопинг агентлигининг тақиқланган рўйхатида мельдоний 2016 йилдан бери рўйхатнинг “S4. Метаболизм гормонлари ва модуляторлари” гуруҳига киритилган допинг моддаси ҳисобланади.
