Наманган вилояти ҳокимлиги Матбуот хизмати хабарига кўра, ихтирочи-инноватор Муҳаммаджон Акрамов хамир қориб, кесиб, чекиб, тайёр зувала қилиб берадиган аппарат яратди.
Қайд этилишича, йигитнинг қурилмаси билан хитойлик компаниялар қизиқишмоқда ва ҳамкорлик ҳам таклиф қилишган.
“Бу қурилмани етти ой давомида ясадик, мукаммаллаштирдик. Бунинг устида яна ишламоқдамиз. Ихтирони муаллифлик ҳуқуқини патентлаш жараёни бошланди. Бизнинг ғояларимиз кўп. Ўзим ёшлигимдан деталларни йиғиб, теришга қизиқаман. Бу қизиқишимиз бугунги кунга келиб, менга манфаат келтирмоқда”, - дейди ихтирочи йигит.
Таъкидланишича, бу ихтиро битта нонвойхонада етти кишининг ишини бажармоқда.
Ҳозирда ушбу қурилма Наманган шаҳрининг Зарбдор ва Гўзал даҳаларидаги нонвойхоналарда ишлатилаётгани, соатига етти юзта зувала тайёрлаш қувватига эгалиги қўшимча қилинган.
