Ижтимоий тармоқларда халқ таълими вазири ўринбосари Дилшод Кенжаев томонидан 2 ноябрь куни имзоланган хат сурати кенг муҳокамаларга сабаб бўлди. Ушбу хатда мактабларда дарслар бошланиши олдидан ўқувчи ва ўқитувчилар жўр бўлиб мадҳия куйлаши, танаффусларда ватан ҳақидаги қўшиқ ва шеърлар эшиттирилиши кераклиги маълум қилинган.
Дилшод Кенжаев хат ҳақиқий эканини Kun.uz'га тасдиқлаган.
Қўшиқ ва шеърлар мактабларнинг имкониятларидан келиб чиқиб, радио ёки овоз кучайтиргич орқали эшиттирилиши мумкин.
Хатдан англашилишича, эшиттириладиган қўшиқ ва шеърлар рўйхати ҳам тузиб бўлинган.
Хатда бундай топшириқ берилишига Президент Администрациясининг 23 октябрдаги йиғилиши баёни асос қилинганлиги баён этилган.
