Россия Савдо-саноат палатаси раҳбари Сергей Катирин мамлакат бош вазири Михаил Мишустинга меҳнат мигрантларининг келишини соддалаштириш бўйича таклиф киритди.
Қайд этилишича, мазкур енгиллик фақатгина коронавирус пандемияси даврида жорий қилиниши кўзда тутилган.
Юборилган хатда Катирин юқори малакали мутахассисларнинг оиласи билан бирга кўчиб келишига рухсат беришни сўраган.
Катиринга кўра, Савдо-саноат палатасига ишбилармонлар ҳамжамияти вакилларидан бу борада кўплаб мурожаатлар келиб тушмоқда.
Бундан ташқари, Савдо-саноат палатаси раиси меҳнат фаолиятини амалга ошириш учун Россияга хориж фуқароларининг киришини аниқ белгилаб олишни сўраган.
Маълум қилинишича, хорижий ишчи кучини жалб қилган рус компаниялари МДҲ давлатларидан кадрлар етишмовчилигини бошдан кечирмоқда. Бу айниқса қурилиш соҳасида кузатилмоқда.