Истанбулда иш топиб бериш ваъдаси билан олиб келинган ўзбекистонлик аёлларни фоҳишалик билан шуғулланишга мажбурлаган жиноий гуруҳ қўлга олинди. Бу ҳақда Habertürk нашри хабар берди.
Мазкур гуруҳни қўлга олиш операциясида 42 нафар шахс кузатувга олинди.
Жорий йилнинг 4 декабрь куни соат 6:00 да Туркия ҳуқуқни муҳофаза қилиш органларининг тезкор гуруҳига олдиндан маълум бўлган уй, меҳмонхоналар каби 17 та манзилга бир вақтнинг ўзида операция ташкил қилинди.
Тадбир давомида жиноий гуруҳнинг бошқарувчиларидан иборат 16 гумондор, фоҳишалик қилишга мажбур қилинган 17 нафар аёл ва 9 нафар мижоз, жами 42 киши қўлга олинди. Операция ўтказилган манзилларда, 63 минг лира (тақрибан, 84 млн сўм) ва гиёҳванд моддалари топилган.
Гуруҳ етакчилари — 5 нафар ўзбекистонлик аёл
Ички ишлар бўлимига олиб келинган гумондорларнинг берган кўрсатмаларидан маълум бўлишича, Ўзбекистон фуқаролари бўлган 5 нафар аёл ўзбекистонлик аёлларга Туркияда иш топиб бериш баҳонаси билан уларни алдаб, Истанбулга олиб келишган.
Улар олиб келинган аёлларни фоҳишалик билан шуғулланишга мажбур қилишган. Гуруҳ етакчилари юборган аёллар келишилган пулнинг ярмини мукофот тариқасида ўзларига олишгани маълум бўлди.
Полиция жиноий гуруҳнинг бошқарув тизимида бўлган 16 нафар гумондорни судга топширган. 17 нафар алданган аёлларни Ўзбекистонга қайтариш учун зарур чоралар кўрилаётгани таъкидланди.
Эслатиб ўтамиз, ўтган ойда Тошкент шаҳрининг турли жойларида қўшмачилик, фоҳишахона ташкил қилиш, фоҳишалик билан шуғуллантириш орқали пулга муҳтож аёлларни маълум миқдордаги пуллар эвазига бошқа эркаклар билан муттасил равишда жинсий алоқада бўлишларига ундаб, бу иш учун уларга шароит яратиб келган жиноий гуруҳ қўлга олинганди.
