Амударё устида Хоразмни Қорақалпоғистон билан боғлайдиган кўприк қурилади. Бу ҳақда Шавкат Мирзиёевнинг Хоразм вилоятига қилган ташрифи доирасида ўтказилган тақдимотда маълум қилинди.
"Ўзбекистон темир йўллари" акциядорлик жамияти раиси Ҳусниддин Ҳосиловнинг айтишича, 2021 йил январидан Амударё устида Хоразмни Қорақалпоғистон билан боғлайдиган 412,7 метрлик кўприк (темир йўл ва автомобиль йўли биргаликда ўтади) қурилади.
– Янги кўприккача бўлган 10 км, кўприк ва кўприкдан кейинги 60 км.гача бўлган темир йўлларнинг ишга туширилиши манзилгача бўлган 240 км масофани қисқартиради. Айни пайтда Хоразм ва Қорақалпоғистон ўртасидаги темир йўл орқали ташилаётган юкларнинг ҳажми 12 млн тоннани ташкил қилаётган бўлса, лойиҳа ишга тушгач бу кўрсаткич 20-25 млн тоннага етади.
Президентимиз ушбу лойиҳа қурилишини январь ойидан бошлаш топшириғини берди ва бу учун зарур бўлган маблағни ажратиб берди, - дейди Ҳусниддин Ҳосилов.
Бундан ташқари, Қораўзак туманидан Шовот туманигача ҳам 79 километрлик темир йўл қурилади.