Сўнгги 40 кун ичида Исроил мудофаа кучлари (ЦАҲАЛ) Фаластиннинг ҲАМАС ҳаракати билан Ғазо секторида ўт очишни тўхтатиш бўйича келишув шартларини 900 мартадан кўпроқ бузди, дея хабар бермоқда Иордания ташқи ишлар вазири Айман ас-Сафадий.
Депутатлар палатаси (парламент қуйи палатаси) йиғилишида сўзлаган нутқида у шартнома ўт очишни тўхтатиш бўйича ўзаро келишувни назарда тутганини таъкидлади.
"Исроил ва ҲАМАС ўртасидаги "гаровга олинганларни" алмашиш тўғрисидаги битим келишув шартларига риоя этилишини назорат қилиш учун Миср-Қатар қўшма тезкор марказини яратишни назарда тутган. Марказ маълумотларига кўра, сўнгги 40 кун ичида Исроил томонидан сулҳнинг 900 дан ортиқ бузилиши қайд этилган," - дея ас-Сафадийнинг сўзларини келтиради Petra агентлиги.
Вазирнинг таъкидлашича, Иордания Исроилнинг анклавдаги тажовузини, шунингдек, Ғарбий қирғоққа қарши қаратилган ноқонуний ҳаракатларини тўхтатиш учун барча саъй-ҳаракатларини давом эттирмоқда.
Ғазо Соғлиқни сақлаш вазирлиги вакиллари 24 март куни ЦАХАЛ Ғазо сектори жанубидаги энг йирик шифохонага зарба берганини, бунинг оқибатида икки киши ҳалок бўлганини, жабрланганлар борлигини маълум қилди. Зарба Хон Юнус шаҳридаги Носир касалхонасининг жарроҳлик бўлимига берилган. Операция қилинган 16 ёшли ўсмир ва шифохонада даволанаётган Фаластиннинг ҲАМАС гуруҳи сиёсий бюроси аъзоси ҳалок бўлган.
Шу куни Ғазода бир суткада 50 дан ортиқ одам ЦАХАЛ ҳаракатлари қурбони бўлгани хабар қилинди. Қайд этилишича, ҳарбийлар ҳаводан зарбалар берган, артиллериядан ўққа тутган ва ўқотар қуроллардан ўт очган. Шунингдек, аниқланишича, 24 март бошидан бери анклав ҳудудида ЦАХАЛ ҳужумлари оқибатида камида 12 киши ҳалок бўлган.
Жорий йил 18 март куни Исроил Мудофаа кучлари Ғазода Фаластиннинг ҲАМАС ҳаракатига қарши ҳарбий операциялар қайта бошланганини эълон қилди. Исроил авиазарбалари оқибатида мингдан ортиқ киши жабрланди, қурбонлар сони 310 нафарга етди.
Шунингдек, ОАВ Исроил АҚШ президенти Дональд Трамп маъмуриятини Ғазога зарбалар қайтарилиши ҳақида олдиндан огоҳлантирганини маълум қилди.