Исроилда автомобиль ҳайдовчиси автобус бекатида турган одамларни уриб кетиши оқибатида 14 киши жабрланди, дея хабар бермоқда Ynet портали.
Хабарда айтилишича, 17 ёшли қиз оғир аҳволда бўлиб, боши ва оёқ-қўлларидан жиддий жароҳат олган. Шунингдек, 60 ёшли эркак ва 19 ёшли аёл бошидан жароҳат олган, уларнинг аҳволи оғир деб баҳоланмоқда. Барча жабрланганлар Хадердаги "Гилел Яфе" касалхонасига ётқизилган.
"Гумонланувчи ҳайдовчи Исроилда ноқонуний яшаган 53 ёшли фаластинлик бўлиб чиқди. ЙТҲ жойидан қочиб кетган автомобиль ҳайдовчиси қочишга уриниб, тўрт километр йўл босган ва полиция томонидан Ган-Шмуэлдаги савдо мажмуасига кираверишда тўхтатилган ва ўша ерда отиб ўлдирилган," - дейилади хабарда.
