Сурхондарё вилоятида она-бола ўлдирилиб, уйи ёқиб юборилгани айтилган хабар ижтимоий тармоқларга сиздирилди. Ушбу ҳолат юзасидан Бош прокуратура матбуот хизмати раҳбари Ҳаёт Шамсутдинов UzNews.uz'га маълумот берди.
Аниқланишича, жорий йилнинг 15 февраль куни Сурхондарё вилояти Узун туманида яшовчи фуқаро Ш.Э. (аёл киши) тунги соат 03:39 атрофида "102" рақамига мурожаат қилиб, унда қўшниси М.Р.нинг (аёл киши) яшаш хонадонида ёнғин бўлаётганлигини маълум қилган.
Мазкур хабарга кўра тезкор-тергов гуруҳи воқеа жойига етиб борганида, фуқаро М.Р. (аёл киши) ва унинг вояга етмаган фарзанди О.Ҳ.нинг (ўғил бола) бош қисмидан олган тан жароҳатлари билан мурдалари топилган. Шунингдек, бош соҳасидан олган тан жароҳати билан вояга етмаган М.Ҳ. ва З.Ҳ. (қиз бола) Узун тумани тиббиёт бирлашмаси жонлантириш бўлимига ётқизилган.
Мазкур ҳолат юзасидан ЖКнинг 97-моддаси 2-қисм "а" банди билан жиноят иши қўзғатилиб, ҳозирда дастлабки тергов харакатлари олиб борилмоқда
