Гватемалада шаҳарлараро автобус ва иккита енгил автомобиль иштирокида содир бўлган йўл-транспорт ҳодисаси оқибатида 53 киши ҳалок бўлди. Бу ҳақда Soy502 ахборот портали маҳаллий прокуратурага таяниб хабар берди.
ЙТҲ кеча, 10 февраль куни эрталаб содир бўлган. Портал аввалроқ автобус иккита енгил автомобиль билан тўқнашувдан сўнг Ла-Пас дамбаси билан туташган Белиз кўпригидаги жарликка қулаб тушгани ҳақида хабар берган эди.
"Шаҳарлараро автобус ЙТҲдан сўнг Ла-Пас шоссесидаги жарликка тушиб кетди. Прокуратура йўл-транспорт ҳодисаси жойида 53 киши ҳалок бўлганини тасдиқлади," - дейилади хабарда.
Миллий суд экспертизаси институтига автобус ҳайдовчиси ва унинг ёрдамчисини токсикологик текширувдан ўтказиш топширилди. Прокуратура ҳодиса жойига туташ ҳудудда кузатув камералари мониторингини олиб бормоқда, шунингдек, гувоҳларнинг кўрсатмаларини тўпламоқда.
Гватемала президенти Бернардо Аревало ҳалок бўлганлар хотирасига уч кунлик мотам эълон қилди.