Ўзбекистоннинг Албаниядаги биринчи Фавқулодда ва мухтор элчиси Бахтиёр Ибрагимов Албания президенти Байрам Бегайга ишонч ёрлиқларини топширди, деб хабар берди "Дунё" АА.
Расмий маросимдан сўнг президент қароргоҳида бўлиб ўтган мулоқотда Ўзбекистон ва Албания ўртасидаги икки томонлама муносабатларни ривожлантириш истиқболлари муҳокама қилинди. Савдо-иқтисодий, маданий ва туризм соҳаларидаги ҳамкорликни мустаҳкамлашга алоҳида эътибор қаратилди.
Албания раҳбари Байрам Бегай Ўзбекистонда президент Шавкат Мирзиёев раҳбарлигида сўнгги йилларда амалга оширилаётган кенг кўламли ислоҳотлар ва уларнинг натижаларини юқори баҳолади.
Ҳар икки томон муносабатларни сифат жиҳатидан янги босқичга олиб чиқишга тайёрлигини тасдиқлади.
Эслатиб ўтамиз, Бахтиёр Ибрагимов 2023 йил ноябрь ойида аккредитациядан ўтган ва Австрия президенти Александр Ван дер Белленга ишонч ёрлиқларини топширган эди. Шунингдек, 2023 йил октябрь ойида у ЕХҲТ, БМТ НЖҚБ, ОҲИЧК, МАГАТЕ ва БМТнинг Венадаги бошқа тузилмалари каби халқаро ташкилотларда Ўзбекистоннинг расмий вакили сифатида аккредитациядан ўтган.