"Туркия президенти Режеп Таййип Эрдоған Жаноби Олийлари томонидан қабул қилинганимиздан хурсандмиз. Ўзбекистон президенти Шавкат Мирзиёев Жаноби Олийларининг энг самимий саломлари ва мактубини етказдик. Раҳбарларимиз ўртасида ўрнатилган биродарлик ришталари ҳар бир соҳада яқин ҳамкорлик қилиш учун энг мустаҳкам пойдевор яратмоқда. Минг йиллик тарих, анъана ва урф-одатлар билан боғлиқ бўлган халқларимиз фаровон келажакни барпо этиш йўлида бир-бири билан яқиндан ҳамкорлик қилмоқда", - дея ёзади вазир Баҳтиёр Саидов.
Ўзбекистон ТИВ раҳбари Баҳтиёр Саидов Анқарага Туркия ва Озарбайжондаги ҳамкасблари билан уч томонлама форумда иштирок этиш учун борган.
"Ташқи ишлар, савдо, иқтисодиёт ва транспортга масъул вазирлар билан биргаликда 2-уч томонлама учрашувни муваффақиятли ўтказдик. Самарали дипломатия, динамик сармоявий ҳамкорлик, савдо ҳажмини ошириш ва алоқаларни кенгайтириш орқали уч қардош халқлар нафақат ўзлари, балки вакиллик қилаётган минтақалар учун ҳам фойда келтиради.
Муҳокамаларимиз кенг қамровли бўлиб, энг долзарб масалаларни ҳал этиш ва мамлакатларимиз учун энг қулай шарт-шароитларни яратиш билан бирга турли тўсиқларни бартараф этиш бўйича аниқ қадамларни белгилаб берди. Учрашувимизнинг асосий натижаси халқларимизнинг барқарор ривожланиши учун дўстлигимиз ва ҳамкорлигимизни мустаҳкамлаш йўлидаги муҳим қадам бўлган Анқара декларациясининг имзоланиши бўлди", - дейди Саидов.