Аввалроқ, ижтимоий тармоқларда бухоролик ҳомиладор аёлнинг туғуруқхонада вафот этгани ҳақида хабарлар тарқалган эди. Унинг турмуш ўртоғи видео мурожаат эълон қилиб, аёлининг ўлимида шифокорлардан норозилигини билдирган. Қолаверса, у аёли вафот этса-да, шифокор ҳали ҳамон ишлаётганлигини айтиб, унга нисбатан чора кўрилишини сўраган.
Ҳолат юзасидан Бухоро вилояти ССБ расмий муносабат билдирди.
Маълум бўлишича, 1992 йилда туғилган аёл М.О. 2024 йил 12 декабрь куни соат 21:50 да РИО ва БСИАТМ ДМ Бухоро филиали(Перинатал марказ)га қабул қилинган. Ўшанда кучли шамоллаш аломатлари: йўтал, тана ҳароратининг 38 даражагача кўтарилиши, қоғоноқ сувларининг кетиши, умумий ҳолсизлик ҳолатида бўлган.
Беморда ушбу ҳомиладорлик камқонлик фонида кечган. Ҳомиладорликнинг 14 ҳафталик муддатида жигар эхинококки ташхиси билан оператив даволанган.
Керакли барча клиник лаборатор, инструментал текширувлар ўтказилган. Керакли мутахассислар (пульмонолог, терапевт) консультацияси ўтказилган. Рентгенография: ўнг томонлама бронхопневмония.
Консилиум асосида стандартларга кўра керакли даво буюрилган, кузатув давом эттирилган. Аёлда туғруқ Миллий стандарт асосида олиб борилган, оператив туғруққа кўрсатма бўлмаган.
2024 йил 13 декабрь куни соат 7:00да тана ҳароратининг 38 даражагача кўтарилиши кузатилган. Таблетка парацетамол берилган. Келишилган шифокорлар консилиумидан кейин тор мутахассислар пульмонолог ва жарроҳ шифокор кўруви ташкил қилинган.
Шу куни соат 12:30 да мунтазам туғруқ дардлари бошланган. Чақалоқ қиз жинсли вазни 4100,0гр бўйи 53 см. 3 дақиқадан сўнг плацента тўлиқ ажралиб чиққандан сўнг, бир вақтда 250мл қон кетган, бачадон гипотонияси кузатилган.
Шу пайтнинг ўзида аҳволи бирдан ёмонлашиб, нафас етишмовчилиги белгилари кузатилган. Тери қопламлари рангпар тусга кириб, сианоз пайдо бўлган.
Бемор кўрсатма асосида сунъий нафас аппаратига уланган ва интенсив реанимацион чора-тадбирлар бошланган. Беморда кардиомониторда юрак фибрилятсияси аниқланган. Юрак фаолиятини тиклаш ва фибрилятсияни олдини олиш мақсадида Адреналин, Атропин, Солумедрол, Норепайн, Дофамин препаратлари қилинган. Пульс периферияда аниқланмаган. Юрак фаолиятини тиклаш мақсадида дефибрилятсия ва юрак бевосита массажи қилинган.
15:05 да бемор аҳволи оғирлашиб, нафас етишмовчилиги, тери сианози кучайган. Керакли чора-тадбирлар олиб борилишига қарамасдан, юрак фаолияти тикланмаган. Аёлда соат 15:15да биологик ўлим қайд қилинган.
Марҳума Суд тиббиёт экспертизасидан ўтказилганда, ўлим сабаби сифатида Қоғоноқ сувлари эмболияси тасдиқланган.
Ҳолат юзасидан Бухоро давлат тиббиёт институтининг профессор-мутахассислари иштирокида хизмат текшируви ўтказилган. Тиббий ҳужжатлар юритилишида хато ва камчиликларга йўл қўйган ходимлар - марказ 2-туғруқ бўлими мудири С.Р.га ҳамда даволовчи акушер-гинеколог З.М.га ўртача ойлик маошидан 30% жарима қўлланилиб, бошқа бўлимга ротация қилинган.