31 мингга яқин одам Лос-Анжелесдаги "Хьюз" ўрмон ёнғини туфайли мажбурий эвакуация қилиниши ҳақида билдиришнома олди, деб хабар бермоқда CBS News телеканали расмийларга таяниб.
"Лос-Анжелес округи шерифи Роберт Луна округнинг 31 минг аҳолиси мажбурий эвакуация ҳақида хабардор қилинганини ва яна 23 минг киши эвакуация зарурлиги ҳақида огоҳлантирилганини айтди," - дейилади хабарда.
Калифорния штати ўрмон хўжалиги ва ёнғиндан сақлаш департаменти ёнғин майдони 9,2 минг акрга (37 квадрат километр) етганини маълум қилди.
Аввалроқ департамент "Хьюз" ёнғини округнинг 20 квадрат километрдан ортиқ ҳудудини қамраб олганини маълум қилган эди.
Жорий йилнинг 7 январь куни Лос-Анжелес округида бошланган ўрмон ёнғинлари штат тарихидаги энг йирик ёнғинлар сифатида тан олинган. Расмий маълумотларга кўра, ёнғинларнинг умумий майдони 16 минг гектардан ошган. Ёнғин натижасида камида 25 киши ҳалок бўлди. Метеорологларнинг қайд этишича, қуруқ об-ҳаво ва шамол ёнғин тез тарқалишига сабаб бўлган.