ИИВ Тезкор-қидирув департаменти томонидан Ўзбекистон ҳудудида тадбиркорлик билан шуғулланиб келаётган Озарбайжон фуқароларидан ноқонуний равишда пул талаб қилиб келган чет эллик шахслардан иборат жиноий гуруҳ аъзолари қўлга олинди.
1983 йилда Озарбайжонда туғилган шахс акаси билан бирга Бектемир туманида жойлашган бозорда цитрус меваларнинг савдоси билан шуғулланиб келган.
Ушбу шахс жорий йилнинг 10 январь куни, ИИВ Тезкор қидирув департаментига ариза билан мурожаат қилиб, таниши бўлган Россия фуқароси билан 2024 йилнинг ноябрь ойларида вақтинча яшаш уйида меҳмондорчилик қилаётган вақтида улар орасида тушунмовчилик келиб чиққанлигини маълум қилган.
Шундан сўнг, жиноий гуруҳ вакили жабрланувчига ножўя сўзлар билан ҳақорат қилганлигини баҳона қилиб, 2024 йил 15 декабрь куни ўзининг жиноий шериги, 1974 йилда Озарбайжонда туғилган, муқаддам бир неча марта судланган шахсни Тошкент шаҳрига чақиртирган.
Унинг ёрдамида жабрланувчига тазйиқ ўтказиб, шаънига айтилган гаплар учун жавоб бериши лозимлигини ва товламачилик йўли билан 5 минг АҚШ доллари миқдоридаги пулларни талаб қилган. Шундан 1 500 АҚШ долларини 15 декабрь куни олиб кетган бўлса-да, яна 3 500 АҚШ долларини талаб қилиб келган.
ИИВ Тезкор-қидирув департаменти ходимлари томонидан 2025 йилнинг 10 январь куни, Миробод туманида ўтказилган тезкор тадбир давомида, гумонланувчилар товламачилик йўли билан талаб қилиб келаётган 3 500 АҚШ долларни олаётган вақтида ушланди. Бу ҳақда ИИВ Матбуот хизмати хабар берди.
Мазкур ҳолат бўйича ЖКнинг 165-моддаси 2-қисм "в" банди билан жиноят иши қўзғатилган. 3 нафар шахс ЖПКнинг 227-моддаси тартибида ушланиб, тергов ҳаракатлари олиб борилмоқда.