АҚШнинг янги сайланган президенти Дональд Трамп ўз вазифасига киришганидан кейин 24 соат ичида Украинадаги можарони тугатишга ваъда берганини изоҳлар экан, унда яна ярим кун борлигини айтди. Унинг таъкидлашича, Украина раҳбари Владимир Зеленский келишувга тайёр.
"Фақат ярим кун ўтди. Яна ярим кун вақтим бор. Кўрамиз. Биз улгуришни истаймиз," - деди Трамп Оқ уйдаги фармонларни имзолаш чоғида бўлиб ўтган матбуот анжуманида.
Америка етакчиси Россия президенти Владимир Путин билан "имкон қадар тезроқ" учрашишини таъкидлади, бироқ режалаштирилган учрашув санасини айтолмади. "Билмайман, бу ҳақда гапира олмайман," - деб жавоб берди у муддатлар ҳақидаги саволга. Трамп тез орада Путин билан гаплашиши мумкинлигини қўшимча қилди.
АҚШ президенти Украина можароси қанчалик тез тугаши ҳақида гапирар экан, буни фақат Путин билан суҳбатда аниқлаштиришини айтди. "Мен президент Путин билан гаплашишим керак, биз буни аниқлашимиз керак. Аксарият одамлар можаро бир ҳафтадан кейин тугайди, деб ўйлаган, ҳозир эса у уч йилдан бери давом этмоқда, ҳамма нарса бўлиши мумкин" — деди Трамп.
Дональд Трамп Зеленский можарони ҳал қилиш бўйича келишувга тайёрлигини таъкидлади. "У менга битим тузишни хоҳлаётганини айтди. Зеленский битим тузмоқчи. Путин шуни хоҳлаяптими-йўқми, билмайман. Мен у билан жуда яхши муносабатда бўлдим ва у битим тузишни хоҳлайди, деб умид қиламан," - деди Трамп.