Аввалроқ, ижтимоий тармоқларда такси ҳайдовчиси мижозни наркотик модда қўшилган сув билан уйқуга кетказиб, унинг номига микроқарз расмийлаштиргани ҳақида хабарлар тарқалди. Ҳолат юзасидан Тошкент шаҳар ИИББ ўрганиш ишларини олиб бориб, расмий муносабат билдирди.
Маълум қилинишича, таксига чиққан фуқаро спиртли ичимлик истеъмол қилган бўлган. Спиртли ичимлик таъсирида бўлган аёл ҳайдовчига телефонини манзил геолокациясини кўриб туриши учун ўз ихтиёри билан топширган ва автомобиль салонида ухлаб қолган.
Аниқланишича, автомобиль ҳайдовчиси ва унинг таниши ухлаб қолган аёл телефонидан фойдаланган. Улар интернет ҳаволаси орқали аёл номига онлайн банклардан бири орқали 12 млн сўм микроқарзни расмийлаштириб олган. Сўнгра, пулларни ўзларининг пластик картасига ўтказиб, пулларни банкомат орқали нақд қилиб олган.
Ҳолат юзасидан ўрганиш ишлари олиб борилиб, ҳар икки шахс ушланган.
Ҳозирда мазкур ҳолат юзасидан ЖКнинг 169-моддаси (ўғирлик) билан жиноят иши қўзғатилган. Жабрланувчига етказилган моддий зарар қоплаб берилган.