Калифорнияда содир бўлган ёнғин оқибатида ҳалок бўлганлар сони 10 нафарга етди. Бу ҳақда CNN суд-тиббий экспертиза департаменти вакилига таяниб хабар берди.
Унинг сўзларига кўра, 9 январь куни кечқурун у ёнғинлар билан боғлиқ 10 та ўлим ҳақида маълумот олган. Ҳозирда ҳалок бўлганларнинг шахсини аниқлаш жараёни давом этмоқда.
Калифорнияда ўрмон ёнғинлари 7 январь кунидан буён давом этмоқда. Бу штат тарихидаги энг ҳалокатли ёнғинлардан бири деб ҳисобланади. Кучли шамол ва паст намлик вазиятни янада оғирлаштирмоқда.
Калифорния ўрмон хўжалиги ва ёнғин хавфсизлиги департаментининг хабар беришича, ўт ўчирувчилар ёнғиннинг учдан бир қисмидан кўпроғини бартараф этишга муваффақ бўлган. Лос-Анжелес ёнғин хизмати вакилининг сўзларига кўра, об-ҳаво шароити яхшиланиши билан ёнғинларнинг локализацияси ортиб боради.
Ёнғин оқибатида минглаб уй ва корхоналар вайрон бўлган, 180 мингга яқин киши эвакуация қилинган. Ёнғин тарқалса, яна 200 минг киши эвакуация қилиниши мумкин. Расмийлар аҳолини хавфсиз жойларда қолишга чақирмоқда.
Аввалроқ президент Жо Байден штатда фавқулодда вазият оқибатларига қарши курашиш ва жабрланганларга федерал ёрдам кўрсатишни тезлаштириш учун фавқулодда ҳолат режимини эълон қилган эди.
"Жанубий Калифорниядаги ёнғинни тўхтатиш ва қайта тиклашга ёрдам бериш учун нимаики керак бўлса, барчасини қилишга тайёрмиз. Аммо биз биламизки, бу жуда узоқ йўл бўлади. Федерал ҳукумат биз сизга керак бўлган вақтгача қолиш учун шу ерда," - деди у.
Ёнғин оқибатида уй-жойидан айрилган айрим америкаликлар суғурта тўловларини ололмайди, чунки суғурта компаниялари уларга ўз хизматларини таклиф этишни тўхтатди, деди АҚШ вице-президенти Камала Харрис.
2020-2022 йиллар оралиғида суғурта компаниялари Калифорнияда 2,8 миллион уй-жой эгалари учун суғурта полисларини узайтиришдан бош тортган, улардан 531 минг нафари Лос-Анжелес округида истиқомат қилади.
Табиий офат туфайли кўплаб таниқли шахсларнинг уйлари ёнғин остида қолди. Улар орасида Парис Хилтон, Энтони Хопкинс, Адам Броди, Анна Ферис, Жефф Бриджес бор.
АҚШ президенти Жо Байденнинг ўғли Хантернинг ижара уйи ҳам ёниб кетган. Шунингдек, АҚШ вице-президенти Камала Харриснинг Лос-Анжелесдаги уйи ўрмон ёнғини туфайли аҳолини эвакуация қилиш зонасига тушиб қолди.