Ўзбекистон ишлатилган ядро ёқилғиси, радиоактив чиқиндилар ва ядровий қурилмаларни эксплуатациядан чиқариш билан боғлиқ ишларни амалга ошириш стратегияси лойиҳасини ишлаб чиқди. Бу ҳақда Озарбайжоннинг Trend нашрига берган интервьюсида Ўзбекистон Вазирлар Маҳкамаси ҳузуридаги Атом энергетикасини ривожлантириш агентлиги (Ўзатом) директори Азим Ахмедхаджаев маълум қилди.
Унинг таъкидлашича, стратегия лойиҳаси республиканинг норматив-ҳуқуқий ҳужжатларига мувофиқ ишлаб чиқилган. Ҳозирда у тегишли вазирлик ва идоралар билан келишилмоқда.
Бундан ташқари, Азим Ахмедхаджаев Ўзбекистон ядровий ёқилғи етказиб бериш бўйича узоқ муддатли шартномалар тузишда мамлакатда қазиб олинадиган табиий урандан қайта ишлаш хомашёси сифатида фойдаланишни кўриб чиқаётганини маълум қилди.
"Маҳаллий хомашёдан фойдаланиш келажакда Ўзбекистон атом станциялари учун етказиб бериладиган ядро ёқилғиси нархини тартибга солиш ва шу орқали ишлаб чиқариладиган электр энергияси таннархини пасайтириш имконини беради," - деди Ўзатом директори.
Шунингдек, у кичик қувватли атом станцияси (КҚАС) қурилишининг бориши ҳақида сўзлаб берди. Унинг сўзларига кўра, ҳозирда қурилиш майдончасида табиий муҳитнинг таркибий қисмларини кузатиш давом этмоқда.
"Ер усти ва ер ости сувлари хусусиятлари, шунингдек, сейсмик фаоллик ва ер юзасининг замонавий ҳаракатлари бўйича аэрометеорологик мониторинг олиб борилмоқда. Ушбу ишларнинг барчаси МАГАТЕ экспертларининг 2022 йилда Ўзбекистондаги SEED (Платформа лойиҳаси ва ташқи воқеалар шарҳи хизмати) миссияси якунлари бўйича берган тавсиялари асосида амалга оширилмоқда. Шунингдек, шартнома доирасида тайёргарлик даври ишлари олиб борилмоқда. Атом станциясининг биринчи блокини ишга тушириш ишлари бошланганидан 60 ой ўтгач амалга оширилиши керак. Ҳар бир навбатдаги блок 6 ой оралиғида ишга туширилади," - деди у.