Жорий йил 24 декабрь куни Шавкат Мирзиёев "2025 йил учун Давлат бюджети тўғрисида"ги қонунни имзолади. Ҳужжат Сенат томонидан 18 декабрь куни маъқулланган ва келгуси йил 1 январдан кучга киради.
2025 йилда ЯИМ 6 фоизга (1,63 квадриллион сўм), 2026 - 2027 йилларда мос равишда 6,1 ва 6,3 фоизга ўсиши прогноз қилинмоқда. Инфляция 7-8 фоиз, 2027 йилда эса 5 фоиз бўлиши кутилмоқда. Саноатнинг ўсиш суръатлари 6,1 фоиз, қишлоқ хўжалигининг 4,1 фоиз, хизматлар соҳасининг 14,5 фоиз ва қурилишнинг 14,2 фоиз даражасида бўлиши кутилмоқда.
Давлат бюджети даромадлари 15 фоизга ошиб, 308,5 трлн сўмни, харажатлари 3 фоизга ошиб, 290,4 трлн сўмни ташкил этади. Шу билан бирга, кутилаётган даромадлар миқдори олдинги прогноздан 22,1 трлн сўмга, харажатлар эса 33,3 трлн сўмга паст.
Давлат мақсадли жамғармаларининг даромадлари 66,4 трлн сўм, харажатлари 117,1 трлн сўм даражасида прогноз қилинмоқда. Давлат қарзини қайтариш харажатлари 46 трлн сўмни ташкил этади.
Солиқ тушумлари ҳажми 242,7 трлн сўм даражасида бўлиши кутилмоқда. Фойда солиғидан тушумлар 39,7 трлн сўмдан 49,7 трлн сўмга ошиши прогноз қилинмоқда.
Бунда ҚҚС тушумлари 74 трлн сўмдан 71,8 трлн сўмгача, акциз солиғи 17,4 трлн сўмдан 15,4 трлн сўмгача, божхона тўловлари 14,8 трлн сўмдан 11,4 трлн сўмгача камайиши кутилмоқда.
Ҳужжат билан 5,5 млрд доллар миқдорида ташқи қарз жалб қилиш лимити белгиланган, шундан 3 млрд доллари давлат бюджетини қўллаб-қувватлашга, 2,5 млрд доллари инвестиция лойиҳаларини молиялаштиришга йўналтирилади. Ўзбекистон номидан чиқариладиган давлат қимматли қоғозларининг чекланган соф ҳажми 30 трлн сўмни ташкил этади.
Консолидациялашган бюджет тақчиллиги ялпи ички маҳсулотнинг 3 фоизи миқдорида белгиланди. Ўтган йили бу кўрсаткич ялпи ички маҳсулотга нисбатан 4 фоиз даражасида эди.
Бундан ташқари, Қорақалпоғистон Республикасининг республика бюджетига, вилоятларнинг вилоят бюджетларига ва Тошкент шаҳрининг шаҳар бюджетига ўтказиладиган солиқларнинг улуши:
• Навоий вилоятида - 66% (2024 йилда 55% бўлган), Тошкент вилоятида - 51% (38%), Тошкент шаҳрида - 12% (11%), Қорақалпоғистон ва бошқа вилоятларда - жисмоний шахслардан олинадиган даромад солиғи тушумларининг 100% (100%) (жисмоний шахслар томонидан мол-мулкни ижарага беришдан олинадиган йиллик даромад тўғрисидаги декларация асосида тўланадиган жисмоний шахслардан олинадиган даромад солиғи, шунингдек, ЯТТ бундан мустасно);
• Навоий вилоятида - 70% (61%), Тошкент вилоятида - 49% (39%), Тошкент шаҳрида - 12% (11%), Қорақалпоғистон ва бошқа вилоятларда - 100% (100%) фойда солиғи тушумларидан (Президент қарори билан тасдиқланадиган рўйхатга мувофиқ йирик солиқ тўловчилар, Ўзбекистонда доимий муассаса орқали ишловчи норезидентлар томонидан тўланадиган фойда солиғи, шунингдек, норезидентларнинг тўлов манбаида ушлаб қолинадиган даромадларидан ташқари);
• Тошкент вилояти ва Тошкент шаҳрида - 5%, Қорақалпоғистон Республикаси ва бошқа вилоятларда - ишлаб чиқарувчилар томонидан тўланадиган алкоголли маҳсулотлар, шу жумладан пиво (импорт қилинадиган алкоголли маҳсулотлар ва пиводан ташқари) учун акциз солиғининг 30%.
Аввалроқ, Иқтисодиёт ва молия вазирлиги томонидан тақдим этилган ўрта муддатли истиқболга мўлжалланган солиқ-бюджет сиёсатининг асосий йўналишлари, шунингдек, 2025 йилда давлат бюджетидан энг кўп маблағ оладиган ташкилотлар ҳақида хабар берган эдик.