Ижтимоий тармоқларда Корея Республикасига кириш визасига эга барча виза (С-визасидан ташқари) турларига ушбу мамлакатга кириш учун авиарейслар ташкиллаштирилгани тўғрисида эълонлар тарқалганди.
Ташқи меҳнат миграцияси агентлиги бу бўйича маълумот берди.
Агентлик томонидан ушбу маълумотларга аниқлик киритиш мақсадида Жанубий Кореянинг Инсон ресурсларини ривожлантириш хизматига сўров юборилди.
Сўровга жавобан, 2020 йил декабрь ва 2021 йил январь ойларида Uzbekistan Airways АЖ ва Asiana Airlines авиакомпаниялари томонидан режалаштирилаётган Тошкент – Инчхон авиарейслари билан фақат розилик битими ҳамда Корея Республикасининг Ўзбекистондаги элчихонаси тавсия этган клиникаларнинг ПЗР тести манфий натижасига эга фуқаролар ушбу мамлакатга кириб бориши тўғрисида маълум қилинган.
Фуқаролар ўзини ўзи яккалаш жойи ва шароити тўғрисидаги тақдим қилган маълумотлар Инсон ресурсларини ривожлантириш хизмати томонидан ўрганилгандан сўнг, ижобий деб топилгандагина фуқароларга Корея Республикасига кириш учун розилик битими берилади.
“Бугунги кунга қадар ишчи визасига эга фуқароларнинг транзит авиарейслар орқали мустақил равишда Корея Республикасига жўнаб кетиш учун уриниш ҳолатлари аниқланмоқда. Натижада, фуқаролар ўзларига иқтисодий зарар етказмоқда”, - дейилади хабарда.
Қайд этилишича, ушбу хатти-ҳаракатлар мазкур давлатга кириб боришни янада кечиктиради ҳамда Корея Республикаси томонидан бошқа фуқароларнинг ҳам ушбу давлатга кириб боришида салбий оқибатларга олиб келади.