Маълум қилинишича, Қашқадарё вилоятида эркак уйига маст ҳолатда келган ва турмуш ўртоғига кўчасида ишлаётган усталарга ёрдам бермоқчи эканлигини айтган. Шунда унинг хотини уларга халақит берманг, дея жанжал кўтарган. Ўртадаги оилавий тортишув давомида уйда сақланаётган ов милтиғи ёрдамида аёлини қўрқитиб қўйиш учун унга қурол ўқталган. Аёл қўрққанидан кўчага қочиб чиққан. Жаҳл устида эркак 25-30 метр узоқликдан аёл югуриб кетаётган томонга ўқ узган. Ўқ аёлнинг орқа томони ва сон қисмига теккан. Аёл бундан жароҳат олиб, шошилинч тез-тиббий ёрдам бўлимига ётқизилган. Бироқ аёл шифохонада вафот этган.
Ҳолат юзасидан суд иши ЖИБ Қарши тумани судида кўриб чиқилди.
Судда эркак айбини қисман тан олиб, хотинини жароҳатлаш нияти бўлмаганини, аёлини қўрқитиш мақсадида ов милтиғи билан бир маротаба ерга қарата ўқ узганлигини, ўқ сочилиб кетиши оқибатида аёли жароҳат олганлигини маълум қилган.
Суд ҳукмига кўра, судланувчи эркак ЖКнинг 126-1-моддаси 3-қисмида назарда тутилган жиноятни содир этганликда айбли деб топилиб, унга нисбатан 1 йил муддатга озодликдан маҳрум қилиш жазоси тайинланди.