Бугун, 5 декабрь куни соат 07:46 атрофида Тошкент вилояти, Ўртачирчиқ тумани "Ким Пен Хва" МФЙ Қутб Юлдузи кўчасида жойлашган ишлаб чиқариш корхонаси маъмурий-хўжалик биносида газ-ҳаво аралашмасининг чақнаши содир бўлган. Чақнаш натижасида ёнғин содир бўлмаган. Бу ҳақда ФВВ Матбуот хизмати хабар берди.
Унга кўра, чақнаш оқибатида 1 нафар фуқаро вафот этган ва 6 нафар фуқаро тан жароҳати олиб, шифохонага ётқизилган.
Воқеа жойига ФВВ генерал-майор А.Х. Қўлдошев етиб борган ва унинг раҳбарлигида вазият оқибатлари бартараф этилмоқда.
Шунингдек, ҳодиса жойига вилоят мутасадди раҳбар ходимлари етиб борган. Айни вақтда ФВВнинг ёнғин-қутқарув экипажлари воқеа жойида амалий ҳаракатларни олиб бормоқда.
Ҳозирда мазкур ҳолат юзасидан дастлабки терговолди суриштирув ишлари олиб борилмоқда.
