"Ўзсаноатқурилишбанк," ССП, "Ўзқурилишматериаллари" уюшмаси ва Ўзбекистон элчихонаси ҳамкорлигида ташкил этилган тадбирда Ўзбекистоннинг йирик ишлаб чиқарувчилари - "Basalt Uzbekistan", "Alcopon Standart Trade", "Sanfa Engineering, Benkam", "Akfa extrusions", "First Global Stone" ва бошқалар, шунингдек, АҚШ қурилиш компаниялари, девелоперлари, дистрибьюторлари ва ритейлерларининг етакчи вакиллари иштирок этди. Бу ҳақда "Дунё" АА хабар берди.
Тадбирда Ўзбекистоннинг АҚШдаги элчиси Фурқат Сидиқов қурилиш соҳаси ҳамкорликни чуқурлаштириш учун истиқболли соҳалардан бири эканини таъкидлади. Унинг сўзларига кўра, Ўзбекистондан АҚШга маҳсулот экспорти 170 фоизга ўсиб, 260 миллион доллардан ошди.
Форум иштирокчиларига юқори қўшилган қийматга эга бўлган 50 дан ортиқ турдаги қурилиш материаллари намуналари, жумладан, алюминий профиллар, базальт маҳсулотлари, сантехника маҳсулотлари, иссиқлик изоляция материаллари, керамогранит ва бошқалар тақдим этилди. Таъкидланишича, маҳсулот Америка компанияларида катта қизиқиш уйғотди, бу эса ҳамкорликнинг кейинги имкониятларини муҳокама қилишга туртки бўлди.
Бизнес-форум доирасида B2B учрашувлари бўлиб ўтди, унда икки мамлакат тадбиркорлари тўғридан-тўғри музокаралар олиб бордилар ва қўшма корхоналар ташкил этиш ва республикада инвестиция лойиҳаларини амалга ошириш истиқболларини муҳокама қилдилар.
Тадбир якунида умумий қиймати 210 миллион долларлик экспорт шартномалари тузилди ва каолин қазиб олиш ва ундан маҳсулотлар ишлаб чиқариш бўйича инвестиция лойиҳасини биргаликда амалга ошириш бўйича келишувларга эришилди.