Ҳозирда ОАВда Буюк Британияда коронавируснинг янгиланган штамми тарқалгани, бу турнинг аввалгисига нисбатан юқумлилиги 71 фоиз бўлиб, одатий COVID-19’га қараганда ўта юқумли эканлиги ҳақида хабарлар тарқалмоқда.
Коронавируснинг мутацияга учраган штамми қанчалик хавфли, у инфекциянинг ҳозирги шаклидан қандай фарқ қилади? Коронавирусга қарши курашиш штаби аъзоси Севара Убайдуллаева саволларга жавоб берди.
— Биз шуни унутмаслигимиз керакки, ҳар қандай вирус атроф-муҳитга мослашиш даврида мутацияга учрайди. Мутациянинг қанчалик кенг кўламда бўлиши вируснинг тарқалувчанлиги билан боғлиқ, яъни касалликни юқтирган ҳар учинчи, тўртинчи одамда бу вирус мутацияси кузатилади. Коронавируснинг кенг тарқалаётган мутацион штамми сентябрь ойида биринчи бор Буюк Британияда аниқланган, бугунги кунда 60 нафардан ортиқ провинцияда бу штамм кузатилаётгани ҳақида маълумотлар мавжуд, - дейди у.
Олимларни кузатиши бўйича COVID-19’нинг мазкур штамми кўпроқ болалар ва ёшларда аниқланмоқда ҳамда касаллик белгиларида деярли ўзгариш йўқ. Лекин бу штамм аниқланганига ҳали кўп вақт бўлмагани боис, касалликнинг оғир ва ўта оғир даражада кечуви ҳақида маълумотлар етарли эмас.
Севара Убайдуллаева rоронавирусга қарши ишлаб чиқилаётган вакциналар касалликнинг янги штаммига таъсирига ҳам тўхталиб ўтди.
— Янги штамм таҳлиллари шуни кўрсатмоқдаки, мутациядан сўнг вируснинг тож оқсилларида ўзгариш бўлган. Булар вируснинг одам танаси ҳужайралари қобиғидан ўтиб, ичкарига киришида калит вазифасини ўтовчи қисмидир. Вирус шу тожлар орқали тана ҳужайраси юзаси билан контактга киришади. Ишлаб чиқилаётган вакциналар коронавируснинг ташқи қобиғи, яъни ёғ кислотаси мавжуд S-оқсилли қобиғига таъсир қилади. Коронавирус мутацияга учраб, ўз генетик штаммини ўзгартирса ҳам вакциналар унинг янги штаммларига таъсир кўрсатиши тўғрисида Буюк Британия ва Россия олимлари таъкидлаб келмоқда. Унгача касалликдан ҳимояланиш учун эса, доимий равишда карантин ва шахсий гигиена қоидаларига риоя қилиш, соғлом турмуш тарзига амал қилиш керак, - деган Севара Убайдуллаева.
Эслатиб ўтамиз, мавжуд эпидемиологик вазиятни инобатга олган ҳолда Ўзбекистон 8 та давлат билан халқаро авиарейсларни тўхтатгани ҳақида хабар бергандик.