Тошкент туманида жойлашган цехда ёнғин бўлаётганлиги акс этган видео ижтимоий тармоқларга сиздирилди. Ушбу ҳолат юзасидан Тошкент вилояти ФВБ Матбуот хизмати маълумот берди.
Унга кўра, бугун, 22 ноябрь куни соат 11:43 атрофида Тошкент вилояти Тошкент тумани "Ободлик" МФЙ Ойбек кўчасида жойлашган МЧЖнинг бирига қарашли бинода ёнғин содир бўлган.
Воқеа содир бўлган жойга зудлик билан Тошкент вилояти Фавқулодда вазиятлар бошқармасиша қарашли 7 та ёнғин ўчириш экипажлари жалб қилинган. Экипажлар ёнғин жойига соат 11:50 да етиб бориб, соат 13:30 да ёнғин тўлиқ ўчирилган.
"Ҳозирда содир бўлган ёнғиннинг келиб чиқиши сабабини аниқлаш бўйича суриштирув ишлари олиб борилмоқда. Ҳодиса оқибатида тан жароҳати олган ва вафот этганлар йўқ", - дейилади хабарда.