Давактив агентлиги хабарига кўра, Lotte City Hotel Tashkent Palace ва International меҳмонхоналарини хусусийлаштириш бўйича келишувга эришилди.
Очиқ савдолар натижаларига кўра, Lotte меҳмонхонасининг 100 фоиз давлат улуши бўйича энг юқори нархни таклиф қилган ALFA INVEST АЖ суғурта компанияси ғолиб деб топилди - $20 млн.
Бундан ташқари, савдо ғолиби Қурилиш ва уй-жой коммунал хўжалиги вазирлиги ҳамда Маданий мерос агентлиги билан келишган ҳолда меҳмонхонанинг ташқи кўриниши билан боғлиқ қурилиш ва бошқа ишларни амалга ошириш мажбуриятини олган.
Интернатионал меҳмонхонаси бўйича ҳам очиқ савдолар якунланди. Уларнинг натижаларига кўра, Smart Fast Stroy МЧЖ меҳмонхонанинг 100 фоиз давлат улушини 26 миллион долларга сотиб олди.
Шунингдек, ғолиб компания International меҳмонхонасининг банк олдидаги 14,7 млн евро миқдоридаги кредитлари бўйича қарзини ўз зиммасига олган. Натижада, МЧЖ билан тузилган битим 41 миллион доллардан ортиқ маблағни ташкил этди.