Ўзбекистон АҚШ билан Жаҳон савдо ташкилотига аъзо бўлиш бўйича икки томонлама музокараларни якунлади. Бу ҳақда президентнинг ЖСТ масалалари бўйича махсус вакили Азизбек Ўрунов маълум қилди.
"14 ойлик қизғин музокаралардан сўнг ЖСТга аъзо бўлиш йўлимизда 21 давлатга айланган Қўшма Штатлар билан икки томонлама музокаралар якунланганини мамнуният билан эълон қиламан," - деб ёзди Азизбек Ўрунов.
Шунингдек, у конструктив ҳамкорлик учун АҚШ савдо вакили офиси, Ўзбекистоннинг Вашингтондаги элчиси Фурқат Сидиқов ва дипломатик ваколатхона ҳузуридаги савдо маслаҳатчиси Оқил Убайдуллаевга миннатдорлик билдирди.
"Президентимиз, Шавкат Мирзиёев жаноби олийлари, Президент Администрацияси ва Идоралараро комиссиянинг сиёсий иродаси, қўллаб-қувватлаши ва раҳбарлигисиз бу амалга ошиши даргумон эди," - дея қўшимча қилди Азизбек Ўрунов.
Эслатиб ўтамиз, сентябрь ойида Ўзбекистон 18 та давлат билан ЖСТга аъзо бўлиш бўйича музокараларни якунлади ва Бразилия ҳамда Шри-Ланка билан бозорга кириш бўйича музокараларни якунлаш тўғрисидаги протоколларни имзолади.
