Вазирлар Маҳкамасининг "Ўзбекистон Республикаси Давлат чегараси соҳасидаги айрим норматив-ҳуқуқий ҳужжатларни тасдиқлаш тўғрисида"ги қарори қабул қилинди.
Ҳужжат билан Давлат чегарасини жиҳозлаш, уни шахслар ва транспорт билан кесиб ўтиш, у орқали товарлар олиб ўтиш, чегарада ва чегара минтақасида хўжалик ва бошқа фаолиятни амалга ошириш, шунингдек, чегара низоларини ҳал этиш тартибини белгиловчи Давлат чегараси режими тўғрисидаги низом тасдиқланди.
Шунингдек, Ўзбекистон ҳудудида чегара режими тўғрисидаги низом тасдиқланди.
Хусусан, чегара зонасида доимий яшовчи шахслар рўйхатга олиш варақасисиз ҳаракатланиши мумкинлиги белгиланди. Чегара зонасида доимий яшамайдиган ва унда 5 кундан ортиқ бўлган шахслар ички ишлар органларидан рўйхатга олиш варақаларини олишлари керак.
Бунинг учун улар профилактика инспекторига ёки маҳалла раисига мурожаат қилишлари керак. Рўйхатдан ўтказиш варақасининг амал қилиш муддати бир ойни ташкил этади, унинг шакли билан ҳавола орқали танишиш мумкин.
Чегара ҳудудига хизмат сафарига юборилган шахслар ёнида шахсини тасдиқловчи ҳужжат ва хизмат сафари ҳужжатлари бўлиши керак.
Чегара ҳудудида жойлашган санаторийлар, дам олиш уйлари, пансионатлар, туристик базалар ва бошқа даволаш-соғломлаштириш муассасаларига ташриф буюрувчи фуқаролар муассасалардан йўлланмалар ёки маълумотномаларга эга бўлишлари керак.
Чегара ҳудудида жойлашган болалар оромгоҳларида болаларнинг бўлишига йўлланмалар асосида йўл қўйилади. Ота-оналар шахсини тасдиқловчи ҳужжат асосида 5 кун давомида ушбу ҳудудларга ташриф буюришлари мумкин.