Бугун Тошкент шаҳар Сергели туманида иккита йўловчи ташиш автобуси иштирокида ЙТҲ содир бўлгани акс этган видео ижтимоий тармоқларга сиздирилди. Ушбу ҳолат юзасидан Тошшаҳартранс АЖ муносабат билдирди.
Унга кўра, бугун 25 сентябрь куни соат 06:45 атрофида “12-Автобус саройи” филиали тасарруфидаги "Yutong" бўлган 117-сонли йўналиш ҳайдовчиси А.Й. бошқарувидаги автобус Янги ҳаёт тумани Хонабод кўчаси бўйлаб ҳаракатланиб кетаётган вақтда, тартибга солинмаган темирйўл кесишмасига етмасдан Қурувчилар кўчаси улгуржи бозор бекатига бурилаётган вақтда, “1-Автобус саройи” филиали тасарруфидаги "Yutong" бўлган, 55-сонли йўналиш ҳайдовчиси Ш.Ш. бошқарувидаги автобус билан тўқнашув содир этган.
Дастлабки маълумотга кўра, ушбу йўл-транспорт ҳодисаси натижасида тан жароҳати олганлар йўқ, автобуслар техник шикастланган.
Ҳозирда содир этилган йўл-транспорт ҳодисаси юзасидан “Тошшаҳартрансхизмат” АЖ Ҳаракат хавфсизлигини назорат қилиш бўлими томонидан хизмат текшируви ўтказилиши белгиланди.
Ушбу ЙТҲ Тошкент шаҳар ИИББ ЙҲХБ инспекторлари томонидан ўрнатилган тартибда расмийлаштирилганлигини маълум қилинди.
