"Камбағалликни qisqartirish ва аҳоли фаровонлигини ошириш чора-тадбирларини янги босқичга олиб чиқиш тўғрисида"ги президент фармони қабул қилинди.
Ҳужжатга кўра, жорий йилнинг қолган даврида давлат ижтимоий-иқтисодий сиёсатининг биринчи навбатдаги вазифаси 500 минг аҳолини, 2025 йилда эса 1 миллион аҳолини камбағалликдан чиқаришдан иборат бўлади.
Шунингдек, "Камбағалликдан фаровонликка" дастури амалга оширилади ва уни амалга ошириш бўйича республика комиссияси тузилади. Дастур 1 ноябрдан бошлаб "Камбағал оилалар учун етти имконият ва масъулият" тамойилига мувофиқ ишлайди ва барқарор бандликка эришиш, таълим олиш, кафолатланган давлат тиббий ва ижтимоий хизматлардан фойдаланиш, турмуш шароитларини яхшилаш ва бошқаларни назарда тутади.
2024 йил 1 декабрдан Ижтимоий ҳимоя миллий агентлиги томонидан "маҳалла еттилиги" томонидан камбағал оилаларнинг ижтимоий шароитлари ва камбағалликка тушиш сабабларини ўрганиш натижалари бўйича камбағал оилалар реестри шакллантирилади.
2025 йил 1 январдан:
- кам таъминланган оилаларнинг болаларига нафақалар ва моддий ёрдам олувчи оилаларнинг расман банд бўлмаган аъзолари ишга жойлашганда, ўзини ўзи банд қилганда, тадбиркорлик фаолиятини йўлга қўйганда, ушбу нафақалар ва моддий ёрдамларни тўлаш муддати тугагунга қадар, бироқ 6 ойдан кўп бўлмаган муддатга давом эттирилади;
- Камбағал оилалар реестрига киритилган, меҳнатга ҳақ тўлашнинг энг кам миқдорининг 1,5 бараваридан кам бўлмаган ойлик иш ҳақи билан ишга жойлаштирилган оила аъзосига ижтимоий солиқ 3 йил давомида 1% ставка бўйича тўланади;
- камбағал оилаларни қўллаб-қувватлаш чоралари меҳнатга лаёқатли оила аъзоларининг бандлигини таъминлаш, ўз томорқа ерларидан самарали фойдаланиш, таълим олиш, оила аъзоларининг, шу жумладан, фарзандларининг касб-ҳунар эгаллаши ва хорижий тилларни ўрганиши, шунингдек, уларнинг саломатлигини назорат қилиш, уй-жойларини озода сақлаш каби шартларни ҳисобга олган ҳолда ижтимоий шартнома асосида амалга оширилади.