Тошкент халқаро аэропортида Ўзбекистон фаунасида мавжуд бўлмаган қушларни яширин олиб кирмоқчи бўлган шахс ушланди. Бу ҳақда Давлат божхона қўмитаси Матбуот хизмати хабар берди.
Аниқланишича, Вьетнамнинг Камрань шаҳридан учиб келган йўловчилардан бирининг багажи белгиланган тартибда божхона назоратидан ўтказилганда, йўловчи божхона декларациясида ва божхона ходимларининг оғзаки сўровида маълум қилинмаган, тегишли рухсатномаларга эга бўлмаган 12 бош қушлар борлиги маълум бўлди.
Мева қутиси орасига яширилган, сақлаш ва ташиш қоидаларига риоя қилинмаган тарзда олиб келинган сариқ ва оқ бўйинли бутақушлар ҳозирги ҳолатини мутахассислар салбий баҳолашмоқда. Жумладан қушлардан 3 боши нобуд бўлган.
Ҳозирда ҳолат юзасидан текширувлар давом эттирилмоқда. Дастлабки ҳисоб-китобларга кўра қушларнинг умумий қиймати тахминан 60 млн сўмдан ошмоқда.
