Қорақалпоғистон божхона бошқармаси "Довут-ота" чегара божхона постида соф оғирлиги 18 кг.дан зиёд синтетик гиёҳвандлик моддасини олиб кирмоқчи бўлган шахс ушланди. Бу ҳақда Давлат божхона бошқармаси Матбуот хизмати хабар берди.
Унга кўра, "Довут-ота" чегара божхона пости, бошқарманинг тезкор тузилмалари ва ДХХ ходимлари билан ҳамкорликда аниқланган мазкур ҳолатда Ўзбекистонга кириб келган Lada Largus автомашинаси белгиланган тартибда божхона кўригидан ўтказилди.
Кўрик давомида автомашина юкхонасидаги 2 дона овоз кучайтиргич холислар иштирокида очиб кўрилганида, уларнинг ичида 36 дона полиэтилен ўрамлар моҳирлик билан яширилганлиги фош бўлди.
Ўрамлардаги оқ рангли, ўткир ҳидли, кукунсимон моддалар эса Марказий божхона лабораториясининг хулосасига кўра 18 кг 97 гр оғирликдаги "мефедрон" синтетик гиёвандлик моддаси эканлиги аниқланди. Ҳозирда ҳолат юзасидан божхона органлари томонидан жиноят иши қўзғатилган.
