Президент электротехника тармоғида ишлаб чиқариш, экспорт ва инвестицияларни янада кўпайтириш чора-тадбирлари бўйича видеоселектор йиғилишида иштирок этмоқда.
Йиғилишда сўнгги етти йилда соҳага 1 миллиард доллар инвестиция киритилгани таъкидланди. Натижада 762 та янги корхона ишга туширилиб, 45 турдаги янги маҳсулотлар ишлаб чиқариш йўлга қўйилди.
Ишлаб чиқариш ҳажми 1,8 баробарга, йиллик даромади 100 млрд сўмдан юқори бўлган корхоналар сони эса 6 тадан 25 тага кўпайди. Бу соҳадаги корхоналарнинг бюджетга тушумлари 8 баробарга ошди.
Маҳаллий маҳсулотлар экспорт қилинадиган мамлакатлар сони сўнгги уч йилда икки баробарга кўпайиб, 62 тага етди.
Президент электротехника экспорти 1 миллиард долларга етгани ва у тўқимачиликдан кейин иккинчи йирик тармоққа айланганини таъкидлади.
"Барча мамлакатлар ўз ички бозорларини фаол ҳимоя қилаётган бир шароитда бизнинг ягона йўлимиз - сифатни таъминлаш ва таннархни пасайтириш орқали маҳсулотларимизнинг рақобатбардошлигини оширишдир," - деди Шавкат Мирзиёев.
