Ўзбекистон давлат санъат музейи коллекциясига алоқадорлиги айтилаётган санъат буюмларининг онлайн сотувга чиқарилгани ҳақидаги хабар ижтимоий тармоқларга сиздирилди. Ушбу ҳолат юзасидан Маданий мерос агентлиги Матбуот хизмати хабар берди.
Мазкур ҳолат юзасидан Маданий мерос агентлиги музей кураторлари билан биргаликда юқорида қайд этилган санъат асарларини синчковлик билан кўздан кечирди. Бу ҳақдаги тегишли суриштирув ва тушунтириш ҳисоботлари музей муҳофизлари томонидан атрофлича қиёсий ўрганилди.
Мазкур суратлар музей коллекциясига мансуб эмаслиги ҳамда уларнинг электрон сотувга чиқарилиши билан Ўзбекистон давлат санъат музейининг реконструкция ва жорий таъмирлаш учун ёпилиши ўртасида ҳеч қандай боғлиқлик мавжуд эмаслигини айтилди.
Шунингдек, Ўзбекистон давлат санъат музейининг барча экспонатлари тўлиқ рақамлаштирилганини, давлат музейларидаги электрон идентификация қилинувчи музей ашёлари ва сара тўпламлари сони барқарор ўсишда давом этаётганини маълум қилинди.
Ҳозирда давлат музейлари фондларидаги музей ашёлари тўпламлари сони 2 525 023 тани ташкил этади. Шундан, 1 815 211 таси асосий фондда, 709 812 таси илмий-ёрдамчи фондда сақланмоқда. 82 067 таси эса музей экспозицияларида намойиш этилмоқда.