Бугун, 13 июль куни соат 03:30 атрофида "Ислом Каримов номидаги Тошкент халқаро аэропорти"да божхона ходимлари авиация хавфсизлигини таъминлаш хизмати ходимлари билан ҳамкорликда "Тошкент- Москва" йўналиши бўйича учиб кетаётган, Ўзбекистон Республикаси фуқаросининг қўл юклари текширувдан ўтказилган. Бу ҳақда «Тошкент-АЭРО» ИБК Ахборот хизматининг UzNews.uz'га хабар қилди.
Натижада божхона назоратига белгиланган тартибда тақдим этилмаган, Ўзбекистон Республикаси чегарасидан олиб ўтилиши чекланган, маданий бойликларга тааллуқли бўлган жами 5 дона (4 дона сариқ ва 1 дона оқ металлдан ясалган) номинали ҳар хил бўлган темир тангалар борлиги маълум бўлган.
Бундан ташқари, соат 04:00 атрофида яна бир шундай ҳолат қайд этилган. Аниқланишича, фуқарода Ўзбекистон Республикаси чегарасидан олиб ўтилиши чекланган, маданий бойликларга тааллуқли бўлган жами 18 дона (3 дона сариқ, 3 дона қора ва 12 дона оқ металлдан ясалган) номинали ҳар хил бўлган темир тангалар борлиги аниқланган.
"Ҳозирда юқоридаги ҳолатлар юзасидан суриштирув ҳаракатлари олиб борилмоқда",- дейилади хабарда.
