Жорий йилнинг 9 июль куни жиноят ишлари бўйича Мирзо Улуғбек туман судида МЖтКнинг 41-1-моддаси 1-қисмида кўрсатилган ҳуқуқбузарликни содир этганликда гумонланган Б.Р.га оид суд иши кўриб чиқилди.
Шу йилнинг 7 июль куни Б.Р. "Яндекс" иловаси орқали фуқаро Ш.Ю.нинг (қиз бола) чақирувига биноан автомашинасида чақирилган манзилга етиб келган. Судланувчи Ш.Ю.ни иловада кўрсатилган манзилга олиб бориб қўйиш жараёнида Б.Р. автомашинасини бошқариб кетаётиб, эгнидаги кийимларини ечган ҳолда ўзининг жинсий аъзоси билан номақбул иш қилиб, шаҳвоний хусусиятга эга бўлган ҳаракатларни қўпол равишда содир этган. Бу ҳақда Тошкент шаҳар судлари Матбуот хизмати UzNews.uz'га маълумот берди.
Суд мажлисида Ш.Ю. 2024 йил 7 июль куни такси ҳайдовчиси Б.Р.нинг автомашинасида кетаётганда ҳайдовчи ўзининг жинсий аъзосини қўли билан ишқалаётганини кўриб, дарҳол автомашинани тўхтатишини сўрагани ва дарҳол “102” рақамига қўнғироқ қилиб, бўлган воқеани айтиб, уларни кутиб турганини маълум қилди. Жабрланувчи ҳуқуқбузарни кечирмаслигини, уни оғир аҳволга солиб қўйгани ва бошқаларга ҳам шу ишни қилмаслиги учун унга оғир жазо тайинлашни сўраган.
Суд ҳукмига кўра, судланувчи Б.Р. МЖтКнинг 41-1-моддаси 1-қисмида назарда тутилган ҳуқуқбузарликни содир этганликда айбдор деб топилди ва унга шу модда билан 5 (беш) сутка маъмурий қамоқ жазоси тайинланди.