Бугун Тошкентдаги 1-сон шаҳар клиник шифохонаси биноси дарз кетгани ҳақида хабар ижтимоий тармоқларга сиздирилди. Ушбу ҳолат юзасидан ССВ Матбуот хизмати муносабат билдирди.
Аниқланишича, мазкур ҳолат кеча, 8 июль куни шаҳар 1-сон клиник шифохонасининг 5 қаватли биноси 2-қаватида кузатилган. Бунинг оқибатида бинонинг балкон қисми тагидаги тўсин дарз кетган.
Шундан сўнг, бу ҳақда дарҳол Фавқулодда вазиятлар вазирлиги тизими ходимларига маълумот берилиб, бўлимда даволанаётган беморларнинг бир қисми вақтинча бинонинг бошқа тарафига эҳтиёт чораси сифатида кўчирилган.
"Ўзоғирсаноатлойиҳа" институти экспертлари томонидан бино тўлиқ текширувдан ўтказилди. Ўрганиш натижасида иншоотнинг зарарланиш ҳолати фақат локал характерга эга эканлиги, дарз кетиш балкон қисмигагина тааллуқлилиги юзасидан хулоса берилди", - дейилади вазирлик хабарида.