Шавкат Мирзиёев 31 май куни Бухоро вилоятига ташрифини Баҳоуддин Нақшбанд мақбараси зиёратидан бошлади.
![](https://api.uznews.uz/storage/uploads/posts/temporary/UrbmYor7JeT701DgPPeV.jpeg)
Давлат раҳбари ташаббуси билан мажмуа янада обод қилиниб, тарихий аслият тикланмоқда. Зиёрат чоғида ушбу ишлар кўздан кечирилди.
![](https://api.uznews.uz/storage/uploads/posts/temporary/N1tMlIkxtkCJQ8bf4Oxa.jpeg)
Аввало, Тоқи миёна дарвозасидан борувчи тарихий йўлак тикланди. Энди зиёратчилар Баҳоуддин Нақшбанд мақбарасига суннатга мувофиқ қибла тарафдан юриб боради.
![](https://api.uznews.uz/storage/uploads/posts/temporary/d5OZ2uLw2ORSRbyWhPPh.jpeg)
“Юз йил вайрон бўлиб ётган бу дарвозани тиклаганимиз - ўзликни англаш, тарихга ҳурматимиз ифодаси. Энди бу ердаги ҳар бир обидага, хонлар дахмаларига битиклар ёзиб қўйиш керак. Зиёратга келганлар қадамма-қадам тарихни ўрганиб, маънавий руҳ олиб ўтсин”, - деди Шавкат Мирзиёев.
![](https://api.uznews.uz/storage/uploads/posts/temporary/ty1MASFqgsfJeHf2L26H.jpeg)
Тоқи миёна дарвозасининг икки ёни боққа айлантирилган. Музей ва таҳоратхона барпо этилган. Йўқолиб бораётган Дониёлбий мадрасаси тикланмоқда.
Олимлар билан суҳбатда Баҳоуддин Нақшбанд меросини чуқур ўрганиш ҳақида фикр алмашилди.
Чет давлатлардан манбаларни олиб келиш, илмий изланишларни қўллаб-қувватлаш, музейни Имом Бухорий мажмуасидагидек мазмунан бойитиш зарурлиги таъкидланди. Шунингдек, зиёратчилар, жумладан, хорижий туристлар учун қулайликларни кенгайтириш, қишга ҳам, ёзга ҳам мос шароитлар яратиш бўйича кўрсатмалар берди.
Мутасаддиларга шуларни қамраб олган ҳолда, олимларнинг таклифлари асосида қарор ишлаб чиқиш топширилди.
![](https://api.uznews.uz/storage/uploads/posts/temporary/pfRpkPDka3HWlPEZKcvv.jpeg)
![](https://api.uznews.uz/storage/uploads/posts/temporary/8ReUFhmoCI2gLLombSsj.jpeg)
![](https://api.uznews.uz/storage/uploads/posts/temporary/9lAcc8Qqp7lp795UA4in.jpeg)