Жаҳон банки Ижрочи директорлар кенгаши "Аҳолининг ижтимоий ҳимояга муҳтож қатламларини интеграциялашувининг инновацион ижтимоий ҳимоя тизими" (INSON) лойиҳасини амалга ошириш учун Ўзбекистонга 100 миллион доллар миқдорида имтиёзли кредит ажратилишини маъқуллади, дея хабар бермоқда Жаҳон банки Матбуот хизмати.
Лойиҳа қўшимча равишда Жаҳон банкининг "Эрта таълим бўйича ҳамкорлик" кўп донорлик мақсадли жамғармасининг 2 миллион долларлик гранти ҳисобидан молиялаштирилади.
Жамғарма фаолияти дунёнинг турли мамлакатларидаги ижтимоий ҳимояга муҳтож болаларнинг ривожланиши ва таълимини қамраб олади. Ушбу маблағлар Ўзбекистондаги ижтимоий ҳимояга муҳтож болаларнинг фаровонлигига маҳаллалар даражасида кўрсатилаётган ижтимоий хизматларнинг таъсирини баҳолаш ва сифатини оширишга йўналтирилади.
"Лойиҳа Ўзбекистонда парваришлаш иқтисодиёти секторининг ҳуқуқий ва институционал асосларини ривожлантиришга ёрдам беради. Бу, шунингдек, минглаб одамлар, жумладан, кексалар, ногиронлар, оиладаги зўравонлик қурбонлари, шунингдек, ижтимоий ҳимояга муҳтож болалар учун ҳали ҳам фойдалана олмайдиган зарур ижтимоий хизматлардан фойдаланишни яхшилашга ёрдам беради", деди Жаҳон банкининг Ўзбекистондаги ваколатхонаси раҳбари Марко Мантованелли.
Лойиҳа Ўзбекистон президенти ҳузуридаги Миллий ижтимоий ҳимоя агентлиги томонидан турли давлат органлари, нодавлат нотижорат ташкилотлари ва мамлакатнинг ижтимоий-иқтисодий ривожлантириш масалалари бўйича халқаро ҳамкорлари билан ҳамкорликда амалга оширилади.
Қуйидаги кўрсаткичларга эришиш кутилмоқда:
• республика бўйича маҳалла даражасида фаолият юритувчи 50 дан ортиқ ижтимоий хизматлар кўрсатиш марказларини ташкил этиш. Уларнинг хизматлари аҳолининг энг заиф қатламларига йўналтирилади;
• аҳолининг ижтимоий ҳимояга муҳтож қатламларидан, жумладан, кексалар, ногиронлар ва ижтимоий ҳимояга муҳтож болалардан 50 мингдан ортиқ фуқароларнинг юқорида қайд этилган ижтимоий хизматлар кўрсатиш марказлари негизида сифатли ижтимоий ва реабилитация хизматларидан фойдаланиш имкониятларини яхшилаш;
• аҳолини ижтимоий муҳофаза қилиш миллий агентлигига уйда, ижтимоий хизмат кўрсатиш марказларида, шунингдек, маҳалла даражасида кўрсатиладиган ижтимоий хизматлар сифати стандартларини ошириш бўйича норматив-ҳуқуқий базани ишлаб чиқишда кўмаклашиш;
• хусусий провайдерлар томонидан ижтимоий хизматлар кўрсатишнинг тартибга солинадиган бозорини ривожлантириш учун шарт-шароитлар яратиш. Жамият даражасида ижтимоий хизматлар кўрсатиш марказларини ташкил этиш аҳолини ижтимоий муҳофаза қилиш органлари томонидан парвариш хизматларига бўлган талабни камайтириши ва ижтимоий хизматларнинг хусусий провайдерлари бозорининг ривожланишини рағбатлантириши кутилмоқда;
• лойиҳа кўмагида аҳолининг ижтимоий ҳимояга муҳтож қатламларидан бўлган фуқароларга индивидуал ижтимоий ёрдам кўрсатиш тизими ишлаб чиқилади;
• 1200 нафар ногироннинг касбий малакасини ошириш ва бандлигини таъминлаш, уларнинг камида ярмини 15-24 ёшдаги ёшлар ташкил этади.
• зўравонлик қурбонларини реабилитация қилиш ва мослаштириш бўйича 29 та марказга мурожаат қилган барча аёлларга юқори сифатли ҳуқуқий, тиббий, психологик ва бошқа ёрдам кўрсатиш. Шунингдек, улар компьютер ва молиявий саводхонлик, шунингдек, муайян касбий кўникмаларни ривожлантириш бўйича қисқа муддатли курслардан ўтишлари мумкин бўлади.
Бундан ташқари, лойиҳа турли хил фавқулодда вазиятларга жавоб бериш учун тайёрланган мослашувчан ижтимоий ҳимоя тизимини ривожлантиришга ёрдам беради. Хусусан, ижтимоий ҳимояга муҳтож қатламларни иқлим ўзгаришига мослаштириш бўйича давлат сиёсати чора-тадбирлари, тегишли механизмлар ва тажриба дастури ишлаб чиқилади.